Podujevë: Arrestohet një person, kjo është arsyeja

Një festë e fejesës në Podujevë ka përfunduar me ndërhyrjen e policisë, pasi një 25-vjeçar është kapur duke mbajtur dhe përdorur armë zjarri.

Ngjarja ka ndodhur më 17 gusht 2025, rreth orës 22:50, ku një zyrtar policor, që ndodhej jashtë detyrës, ka vërejtur një person me një armë të gjatë të tipit AK-47.

Policia ka ndërhyrë menjëherë, duke e ndaluar të dyshuarin dhe duke sekuestruar armën. Në vendngjarje janë gjetur edhe disa gëzhoja, të cilat u morën si prova materiale.

Gjatë intervistimit, i riu ka pranuar se kishte shtënë në ajër për shkak të fejesës. Me urdhër të Prokurorit Kujdestar, rasti është iniciuar për veprat penale “Mbajtja në pronësi, kontroll ose posedim i paautorizuar i armës” dhe “Përdorimi i armës apo mjetit të rrezikshëm”.

25-vjeçari është ndaluar për 48 orë, ndërsa hetimet lidhur me rastin po vazhdojnë.