Xhevdet Maloku mbajti fjalën, Lluzhani do të bëhet me shkollë të re

Fshati Lluzhan dhe rrethina e tij do të përfitojnë nga një investim i rëndësishëm në arsim, pasi ndërtimi i shkollës së re është përfshirë në Kornizën Afatmesme Buxhetore (KAB) 2026–2028.

Sipas asamblistit të Lëvizjes Vetëvendosje në Kuvendin Komunal të Podujevës, Xhevdet Maloku, për këtë projekt janë paraparë 300 mijë euro në vitin 2027 për fillimin e punimeve, ndërsa 500 mijë euro të tjera në vitin 2028 për përfundimin e ndërtimit.

“Ky nuk është vetëm një investim në një objekt, por një angazhim konkret për të ardhmen e fëmijëve tanë dhe për zhvillimin e zonave rurale si Lluzhani,” ka thënë Maloku, duke falënderuar kryetarin e Komunës dhe drejtorin e Arsimit për përfshirjen e këtij projekti në planin buxhetor.

Ai ka shtuar se si përfaqësues i Lluzhanit, ka ngritur vazhdimisht zërin që ky fshat të mos mbetet pas në investime dhe se ky rezultat është fryt i përkushtimit dhe bashkëpunimit.

Ndërtimi i shkollës së re në Lluzhan pritet të përmirësojë dukshëm kushtet e mësimit për nxënësit, prindërit dhe mësimdhënësit e kësaj ane.