Muhamet Hyseni rikthehet te Llapi pas aventurës në Danimarkë

Sulmuesi kosovar, Muhamet Hyseni, është rikthyer sërish te Llapi pas një viti të vështirë në Danimarkë me skuadrën e Horsens.

Dikur golashënuesi më i mirë i Superligës dhe me një transferim rekord drejt ligës daneze, Hyseni nuk arriti të lë asnjë gjurmë, duke kaluar shumicën e kohës si rezervist.

Pa destinacione të tjera konkrete, ai ka vendosur të rikthehet te ekipi i Tahir Batatinës, duke i shtuar forcë sulmit llapjan në këtë fillim sezoni.

Mbetet për t’u parë nëse Hyseni do të arrijë të rikthejë formën që e bëri një nga sulmuesit më të rrezikshëm në futbollin kosovar.