Suspendohet nga puna Naime Krasniqi
Këshilli Gjyqësor i Kosovës (KGJK) e ka suspenduar nga puna gjyqtaren e Gjykatës Themelore në Prishtinë, Naime Krasniqi-Jashanica, të përfshirë në audio-inicizimin në një rast të dhunës së familjes.
KGJK-ja tha se e ka themeluar një panel hetimor për rastin disiplinor ndaj Krasniqi-Jashanicës.
“Këshilli, pas shqyrtimit dhe analizimit të rastit disiplinor ka themeluar panelin hetimor dhe me votim unanim ka vendosur për suspendimin e subjektit të hetimit, deri në një vendim tjetër të Këshillit”, tha KGJK në një komunikatë të martën.
Këshilli vlerësoi se suspendimi i subjektit të hetimit, “në këtë fazë të procedurës, do të krijojë parakushte që paneli hetimor të hetoj në tërësi çështjen në mënyrë të pavarur, objektive dhe të pa ndikuar”.
Audio-incizimi vë në pah se si prokurorja dhe gjyqtarja diskutojnë me një të akuzuar për dhunë në familje, drejtojnë ofendime dhe përçmim ndaj një viktime të dhunës në familje që ishte palë në proces.
