Kosova nuk gjen qetësi, tentim vrasje, dy persona gjuajnë drejt kushërinjëve të tyre

Një rast i rëndë i tentativës për vrasje është regjistruar të hënën në fshatin Caravik të Klinës, mëson ekskluzivisht Gazeta Sinjali.

Burime të sigurta bëjnë me dije se dje rreth orës 15:30, pas një mosmarrëveshjeje, të dyshuarit D. K. dhe A. K. kanë shtënë me armë zjarri në drejtim të viktimave F. A. dhe D. A., të cilët ndodheshin në kamionetën e tyre gjatë lëvizjes.

Policia, pas arritjes në vendin e ngjarjes, ka gjetur tre gëzhoja dhe ka konstatuar dëmtime nga plumbat në pasqyrën anësore të kamionetës. Hetuesit rajonalë dhe njësia e krim-teknikës kanë kryer ekzaminimet e nevojshme.

Me urdhër të Prokurores për Krime të Rënda, rasti është iniciuar si “Vrasje në tentativë”. Në kuadër të hetimeve është kryer edhe një bastisje në fshatin Bubavec të Malishevës, ku dyshohej se mund të ishte fshehur arma, por nuk është gjetur asgjë e dyshuar.

Dy të dyshuarit janë arrestuar nga Policia në Malishevë dhe me urdhër të prokurorisë janë dërguar në ndalim policor për 48 orë.

Hetimet për rastin janë duke vazhduar.