Kjo është kërkesa e prokurorisë ndaj Thaçit

Zyra e Prokurorit të Specializuar e udhëhequr nga prokurorja Kimberly West ka kërkuar vazhdimin e paraburgimit për Hashim Thaçin në rastin ku ai së bashku me Kadri Veselin, Rexhep Selimin dhe Jakup Krasniqin akuzohet për krime lufte dhe krime kundër njerëzimit.

Prokuroria thekson se ekziston dyshimi i bazuar se Thaçi ka kryer vepra penale që bien në juridiksionin e Dhomave të Specializuara të Kosovës në Hagë, dhe rreziku i arratisjes apo ndikimit në dëshmitarë mbetet i lartë, raporton Podujeva Sot.

Sipas Prokurorisë, Thaçi është i vetëdijshëm për seriozitetin e akuzave dhe mund të dënohet me burgim të gjatë. Për më tepër, ai paraqet rrezik të jashtëzakonshëm për të penguar procedurat gjyqësore dhe për të ndikuar dëshmitarët.

Prokuroria mbështetet edhe në precedentë të mëparshëm, duke përfshirë rastet Gucati dhe Haradinaj, ku klima e frikësimit të dëshmitarëve është konsideruar një çështje kritike, raporton Podujeva Sot.

Më 14 shtator 2025, në Hagë u mbajt një protestë masive në përkrahje të ish-krerëve të UÇK-së, ndërsa DhSK-ja ka caktuar 14 nëntorin 2025 si datë për përfundimin e çështjes së mbrojtjes. Paraqitjet përfundimtare të Prokurorisë dhe mbrojtësve të viktimave priten deri më 22 dhjetor 2025.

Aktakuza ndaj Thaçit, Veselit, Selimit dhe Krasniqit është konfirmuar më 26 tetor 2020 dhe përbëhet nga akuza për krime lufte dhe krime kundër njerëzimit, duke përfshirë incidente në Gjilan, Budakovë dhe Semetishtë.