Plagoset një person pas mosmarrëveshjes në trafik

Një incident i rëndë ka ndodhur sot në Fushë Kosovë, mëson ekskluzivisht Gazeta Sinjali.

Burimet thonë se rreth orës 15:50, në rrugën “Dardania”, pranë shkollës “Mihal Grameno”, është raportuar për një kanosje që ka përfunduar me të shtëna me armë zjarri.

Sipas të dhënave nga vendi i ngjarjes, personi i dyshuar ka qenë duke lëvizur me veturë të tipit Audi A3, ngjyrë e zezë, dhe është larguar menjëherë pas të shtënave.

Viktima, A. M, 40 vjeçar, është paraqitur në stacion policor dhe ka bërë të ditur se është plagosur në gishtin e këmbës së majtë. Ai po merr trajtimin e nevojshëm mjekësor dhe është jashtë rrezikut për jetë.

Nga rrëfimi i tij, viktima pretendon se nuk e njeh të dyshuarin, por se paraprakisht kanë pasur mosmarrëveshje në komunikacion, që dyshohet të ketë çuar në përshkallëzimin e situatës.

Patrullat policore janë aktualisht në terren dhe po zhvillojnë kërkime për identifikimin dhe kapjen e të dyshuarit, thonë burimet e Sinjalit.

Prokurori i rastit ka autorizuar procedurat e nevojshme, ndërsa hetimet po vazhdojnë.