Vepra e fundit e Fatmir Halimit, romani “Suzi”, pritet të botohet së shpejti

Shkrimtari i njohur llapjan Fatmir Halimi, i cili u nda nga jeta para tre muajsh, kishte lënë në proces botimi romanin e tij të fundit me titull “Suzi”, një vepër e cila ishte përkrahur nga Ministria e Kulturës, Rinisë dhe Sportit.

Ky njoftim u bë publik gjatë Takimeve Letrare “Kadri Kadriu”, ku familja e tij mori pjesë në ceremoninë përkujtimore të organizuar nga Drejtoria e Kulturës, me ç’rast u nda edhe një mirënjohje për nderim të figurës dhe kontributit të tij në letërsinë shqipe.

Në këtë event, fjalën e mori vajza e tij, Saranda Halimi, e cila pas falënderimit për institucionet dhe të pranishmit, njoftoi se romani “Suzi” ishte planifikuar të botohej në muajin shtator, pikërisht në muajin kur shkrimtari ndërroi jetë. Për shkak të rrethanave, botimi ishte shtyrë, ndërsa tani procesi po vazhdon dhe libri pritet të dalë shumë shpejt.

Po ashtu, u bë e ditur se me rastin e botimit të romanit do të organizohet edhe një promovim i veçantë i librit, i shoqëruar me një event përkujtimor për jetën, veprën dhe kontributin letrar të Fatmir Halimit, një emër i çmuar i letërsisë shqipe.

Fatmir Halimi la pas një trashëgimi të rëndësishme letrare, ndërsa romani “Suzi” pritet të jetë një dëshmi e fundit e përkushtimit dhe talentit të tij krijues.