Barcelona zyrtarizon transferin e parë në merkaton dimërore
Barcelona tashmë ka zyrtarizuar Joao Cancelon si lojtarin e tyre më të ri, i cili vjen në formë huazimi prej gjashtë muajsh nga ekipi arab, Al-Hilal.
Në bazë të deklaratës zyrtare të klubit, Cancelo pritet ta mbajë numrin 2 në shpinë përgjatë sezonit, shkruan Insajderi.
“Tashmë zyrtare: João Cancelo është përsëri lojtar i Barcelonës. FC Barcelona dhe Al Hilal Saudi FC kanë arritur një marrëveshje për huazimin e mbrojtësit portugez deri në fund të sezonit. Ai do të veshë fanellën me numër 2”, thuhet në deklaratën zyrtare të blaugranasve.
Mbrojtësi portugez më parë e kishte veshur fanellën e Barçës gjatë sezonit 2023/24, kur u bashkua me ekipin në formë huazimi nga Manchester City. Në atë sezon ai luajti një rol të spikatur, duke u paraqitur në 42 ndeshje (32 në La Liga dhe 10 në Ligën e Kampionëve) duke shënuar katër gola (dy në La Liga dhe dy në Ligën e Kampionëve) dhe duke dhënë pesë asiste (katër në La Liga dhe një në Ligën e Kampionëve).
Pasi periudha e tij e huazimit përfundoi më 30 qershor 2024, ai u transferua te Al-Hilal SFC, klubi i tij aktual, ku ka luajtur 45 ndeshje gjatë një sezoni e gjysmë. /Insajderi.org/
