Tjetër festë në familjen Jashari
Pak ditë pas fejesë së Hamzë Jasharit, Bekim Jashari ka publikuar një lajm tjetër për një tjetër festë në familje.
Kësaj radhe bëhet fjalë për ditëlindjen e djalit të tij, Besimit, i cili emrin e ka trashëguar nga vëllau i Bekimit.
Më poshtë postimi i Bekim Jasharit:
Dy Besima ka familja jonë.
Babushi e pagëzoi me emrin Besim djalin e dytë të tij, sepse ai besonte në diçka hyjnore, besonte në forcën e popullit të tij, në idealet e tij, të familjes dhe të shokëve, besonte në arritjen sublime, çlirimin e vendit, besonte në Zot.
Besimi ra për Liri, duke luftuar krah Fitimit të Komandantit, deri në rënie.
Besimi ra, por pas tij erdhi Besimi i ri, djali im, i lindur 6 vite pas betejës së 5, 6 dhe 7 marsit.
Djali im, Besimi, nuk mban vetëm emrin e vëllait tim, por edhe peshën e axhës që u flijua në moshë shumë të re për më sublimen, Lirinë.
Ata që e njohin Besimin e dinë se i ngjason dijes dhe urtësisë se babës Shaban, guximit dhe mprehtësisë së mendimit, vendosmërisë dhe dashurisë së babushit Hamëzes.
Urime ditëlindjen, Besim,
Të urojmë edhe shumë vite të tjera të lumtura pranë nesh!
Gëzuar!
