Murati tregon kur ekzekutohet paga e 13-të

Ministri i Financave, Hekuran Murati, prezantoi para deputetëve projektligjin për ndarjet buxhetore të vitit 2026.

Ai ka sqaruar arsyet e mosmiratimit në afat dhe pasojat që kjo ka prodhuar në funksionimin financiar të institucioneve.

Minsitri Murati tha se projektligji ishte dorëzuar brenda afatit ligjor, më 31 tetor të vitit të kaluar, por për shkak të mungesës së një Kuvendi funksional dhe të konsensusit politik pas konstituimit, ai nuk arriti të miratohej para 1 janarit.

Si pasojë, vendi ka funksionuar me zgjatje buxhetore automatike, fillimisht për dy muajt e parë të vitit dhe më pas edhe për muajin mars.

Sipas tij, zgjatjet buxhetore mbulojnë vetëm shpenzimet rrjedhëse, ndërsa pamundësojnë nisjen e projekteve të reja kapitale dhe procedurave të prokurimit, për shkak se mjetet nuk mund të zotohen për tërë vitin nëse janë të alokuara vetëm për një pjesë të tij.

Ministri bëri të ditur se Qeveria e re ka vendosur ta procedojë projektligjin në formën ekzistuese, me qëllim të zhbllokimit të buxhetit në nivel qendror dhe lokal. Ndryshimet që lidhen me prioritetet e reja qeveritare dhe strukturën e dikastereve do të trajtohen përmes një rishikimi të mëvonshëm.

Ai sqaroi se projektligji mbetet në thelb i njëjtë me versionin e miratuar më 31 tetor, me disa dallime teknike, përfshirë ndryshimin e kohës së pagesës së pagës së 13-të, e cila parashihet të ekzekutohet në fillim të vitit dhe jo në fund të tij. Po ashtu, është paraparë mundësia e rishikimit të tabelave buxhetore pas miratimit të rregullores së re të Qeverisë.

Sa i përket përmbajtjes financiare, kufiri i përgjithshëm i shpenzimeve për vitin 2026 parashihet të jetë rreth 3 miliardë e 967 milionë euro. Nga kjo shumë, 980 milionë euro janë të destinuara për paga dhe shtesa, 545 milionë për mallra dhe shërbime, 1 miliard e 358 milionë për subvencione dhe transfere, ndërsa rreth 998 milionë euro për shpenzime kapitale.

Në anën tjetër, të hyrat buxhetore totale parashihen të arrijnë në 3.64 miliardë euro, prej të cilave 3.26 miliardë euro janë të hyra tatimore dhe 357 milionë euro jo tatimore. Diferenca mes shpenzimeve dhe të hyrave do të mbulohet përmes huamarrjes ose granteve nga donatorët.