LAJMI I FUNDIT: Plagoset një person në Milloshevë

Një incident i rëndë me armë zjarri ka ndodhur pasditen e së dielës në fshatin Milloshevë të Obiliq, ku një person ka mbetur i plagosur, ndërsa i dyshuari është larguar nga vendi i ngjarjes.

Ngjarja është raportuar më 15.02.2026 rreth orës 18:15, pasi Qendra e Mjekësisë Familjare në Obiliq ka njoftuar Policinë se një person kishte kërkuar ndihmë mjekësore pasi ishte plagosur me armë zjarri.

Sipas burimeve të afërta me hetimin, i plagosuri rreth 31 vjeç ka deklaruar se ishte qëlluar në këmbën e majtë nga një person tjetër, i cili dyshohet se ka përdorur një revole. Mjekët kanë bërë të ditur se gjendja e tij është stabile dhe jashtë rrezikut për jetë, ndërsa për trajtim të mëtutjeshëm është dërguar në QKUK në Prishtinë.

Njësitet policore, hetuesit dhe forenzika rajonale kanë dalë në vendin e ngjarjes, një lokal në Milloshevë ku dyshohet se ka ndodhur plagosja. Gjatë ekzaminimit të lokacionit është gjetur një predhë nën një ulëse, ndërsa gëzhoja nuk është hasur.

Është intervistuar edhe një dëshmitar, punëtor i lokalit, ndërsa hetuesit dyshojnë se incidenti ka ndodhur si pasojë e problemeve të mëhershme mes palëve.

Policia ka zhvilluar kërkime edhe në një fshat tjetër për lokalizimin e të dyshuarit, por ai nuk është hasur në shtëpinë e tij. Atij i është lënë ftesë për paraqitje dhe aktualisht konsiderohet në arrati.

Me udhëzim të prokurorit kujdestar, rasti është iniciuar për veprat penale: lëndim i rëndë trupor, shkaktim i rrezikut të përgjithshëm dhe mbajtje në pronësi, kontroll ose posedim të paautorizuar të armëve.

Hetimet janë në zhvillim dhe autoritetet po punojnë për arrestimin e të dyshuarit.