Një person i dyshuar për krime lufte kundër popullatës civile është arrestuar në pikëkalimin kufitar në Merdarë, pas veprimeve hetimore të zhvilluara nga Sektori për Hetimin e Krimeve të Luftës.

Bëhet fjalë për Zoran Stankovic, i cili dyshohet se gjatë muajve prill-maj 1999 në Prishtinë, në bashkëkryerje me pjesëtarë të forcave policore, ushtarake dhe paramilitare serbe, ka kryer veprime të rënda ndaj civilëve shqiptarë.

Sipas hetimeve, i dyshuari dyshohet se ka kanosur, rrahur, maltretuar dhe plagosur qytetarë shqiptarë, si dhe ka kryer plaçkitje gjatë kohës kur popullata civile po dëbohej me dhunë nga shtëpitë e tyre.

Në mesin e veprimeve të dyshuara përfshihet edhe një rast në lagjen Matiqan, ku dyshohet se ka marrë pjesë në vendosjen e një mjeti shpërthyes në një veturë, e cila më pas ka eksploduar, duke shkaktuar dëme materiale dhe panik tek banorët.

Po ashtu, ai dyshohet se ka ushtruar dhunë fizike ndaj anëtarëve të familjeve shqiptare dhe ka shtënë me armë zjarri në drejtim të shtëpive, duke plagosur civilë.

Sipas autoriteteve, këto veprime janë kryer në mënyrë sistematike, duke shkaktuar frikë, terror dhe dëbim të popullatës civile shqiptare.

Pas ndalimit në Merdarë më 23 mars 2026, i dyshuari është shoqëruar në Prishtinë dhe, me urdhër të Prokurorit Special të PSRK-së, i është caktuar masa e ndalimit për 48 orë.

Rasti po hetohet si “Krime lufte kundër popullatës civile”, në përputhje me legjislacionin penal dhe normat ndërkombëtare.