34-vjeçari tenton ta godas me veturë të dashurën e tij

Dhuna në familje është shndërruar në makth për vajzat dhe gratë në vendin tonë.

Numri i rasteve që denoncohen çdo ditë në Polici ka marrë përmasa shqetësuese, pasi që vetëm gjatë këtij viti janë raportuar mbi 2 mijë raste të dhunës në familje.

E shumë nga këto raste ndër vite kanë përfunduar me fatalitet për gratë, raporton Gazeta Sinjali.

Në Polici së fundi kanë përfunduar dhe një çift nga komuna e Fushë Kosovës, pasi burri dyshohet se ka tentuar që të godas me veturë të dashurën e tij.

Sinjali mëson se 40-vjeçarja ka njoftuar organet e hetuesisë se personi me të cilin bashkëjeton tash e disa muaj, ushtron dhunë psikike dhe fizike në mënyrë të vazhdueshme dhe sipas saj, e gjithë kjo ndodh për shkaqe xhelozie.

Rasti i fundit ka ndodhur të shtunën, kur viktima derisa po ecte rrugës me vajzën e saj, ka vërejtur të dyshuarin i cili ka tentuar që ta godas me veturë, mirëpo ajo ka arritur që t’i shmanget dhe të shpëtojë.

Si rezultat i denoncimit, njësitë policore kanë arritur që të arrestojnë të dyshuarin i cili është shoqëruar në stacion policor për intervistim, ku para hetuesve ka mohuar të ketë kryer veprën për të cilën dyshohet.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit në kohëzgjatje prej 48 orësh dhe i njëjti do të hetohet nën dyshimet për kryerjen e veprës penale ‘Dhunë në familje’.