Imami i xhamisë “Bedri Kamberi” në Prishtinë, Labinot Maliqi, ka bërë një thirrje publike për nxënëset që kanë vendosur shaminë apo që planifikojnë të mbulohen, duke i inkurajuar ta bartin atë me krenari dhe dinjitet në shkolla, me fillimin e vitit të ri shkollor.

“Shamia me fytyrë të dukshme nuk është pengesë për arsimim. Ajo përbën të drejtë themelore të njeriut për ushtrim të lirisë së besimit dhe ndërgjegjes, të garantuar me Kushtetutën e Republikës së Kosovës dhe ligjet në fuqi”, theksoi ai, raporton PodujevaSot.net

Maliqi përmendi dispozitat kushtetuese dhe ligjore që garantojnë këtë të drejtë, si Neni 24 për barazinë para ligjit, Neni 38 për lirinë e besimit dhe ndërgjegjes, dhe Neni 47 për të drejtën në arsimim. Ai po ashtu përmendi Ligjin për Arsimin Parauniversitar, Ligjin për Mbrojtje nga Diskriminimi dhe konventat ndërkombëtare për të drejtat e njeriut dhe të fëmijës.

Imami theksoi se asnjë institucion arsimor dhe asnjë staf shkollor nuk mund t’u mohojë vajzave arsimimin për shkak të shamisë, duke e cilësuar një veprim të tillë si “kundërligjshëm, diskriminues dhe antikushtetues”, raporton PodujevaSot.net

Ai u bëri thirrje prindërve dhe kujdestarëve të reagojnë dhe ta kontaktojnë nëse vajzat e tyre hasin në pengesa apo presione, duke paralajmëruar ndërmarrjen e hapave ligjorë dhe institucionalë.

“Nxënëset që kanë zgjedhur mbulesën si shprehje të besimit të tyre, mos u frikësoni dhe mos u ndjeni të përjashtuara. Ju keni të drejtë të arsimoheni dhe të zhvilloni dijen tuaj si çdo bashkëmoshatare tjetër. Shamia është pjesë e identitetit dhe vlerave tuaja shpirtërore”, tha Maliqi në fund, duke uruar një vit të ri shkollor të suksesshëm për të gjithë nxënësit e Kosovës.