Rreth orës 7:00 të mëngjesit të 5 nëntorit të vitit të kaluar, Shefki Llaushës ia kumtuan lajmin përmes telefonit se vëllai i tij i madh, Adem Llausha ishte shtrirë në Emergjencën e Qendrës Klinike Universitare të Kosovës.

Kjo pas një aksidenti në të cilin ishte përfshirë, derisa ishte duke punuar taksist në ndërrimin e natës.

Atë ditë, në ora 4:19 e mëngjesit teksa po lëvizte me veturën e punës, u godit nga një veturë zyrtare e Policisë së Kosovës, të cilën e ngiste zyrtari policor L. M., raporton Kiks Kosova.

Aksidenti ndodhi në kryqëzimin e rrugës “Dëshmorët e Kombit”-“Henri Dunan”, në Prishtinë.

Në veturën e policisë ishin pesë zyrtarë policorë. Katër burra dhe një grua.

Shpejtësia e veturës së policisë ishte aq e madhe e goditja mes dy automjeteve ishte aq e fortë, sa familjarët thonë që trupi i viktimës kishte dalë nga automjeti.

Për dy javë, 76 vjeçari qëndroi në komë.

Shpresat e familjarëve ishin të mëdha se më i dashuri i tyre do të zgjohej e do të kthehej te bashkëshortja e djali i tij i vetëm, 15 vjeçar.

Mirëpo, vushtrriasi nuk arriti t’iu bëjë ballë lëndimeve. Ai vdiq më 17 nëntor 2024.

Dhimbjen për vëllain e madh, nga i cili thotë se ishte rritur, Fehmi Llausha e kishte përjetuar shumë keq.

Më së shumti thotë se i dhemb fakti që i ndjeri kishte luftuar me UÇK-në për liri e sipas tij, në liri shteti ia mori jetën.

Mirëpo, familjes Llausha i ka mbetur hatri për diçka.

Gjatë kohës sa vëllai i tyre Ademi gjendej në koma, ata thonë se për 2 javë, as nga policia e as nga prokuroria s’kishin ardhur t’ua merrnin deklaratat.

Nga ana tjetër, familjarët e viktimës dyshojnë se për shkak se pala e përfshirë në aksident është polic, institucionet po mundohen t’ia hedhin fajin viktimës, duke e bërë shkaktar të ndeshjes.

Nga kjo tragjedi, ata kërkojnë drejtësi për më të dashurin e tyre të ndjerë, të cilit sipas familjes nga Vushtrria iu mëvesh faji për aksidentin që ndodhi në Prishtinë. /Klankosova.tv