Pasi jemi në sezonën e dasmave edhe gjuajtjet me armë nga kosovarët nuk kanë të ndalur, e ku në shumë raste nga pakujdesia e tyre po rrezikohet edhe jeta e qytetarëve përreth, raporton Gazeta Sinjali.

Një rast i tillë ka ndodhur në një dasëm familjare në fshatin Shtaricë të Klinës ka përfunduar me ndërhyrje të Policisë, pasi Haki Tafilaj, rreth 60-vjeçar ka shtënë disa herë me armë në ajër gjatë festës për martesën e vajzës së tij.

I dyshuari ka pranuar para hetuesve se kishte përdorur një pistoletë me gaz, duke deklaruar se “e kemi zakon me gjuajt në dasma”. Gjatë kontrollit në shtëpinë e tij, policia ka sekuestruar edhe një pushkë ajrore kalibër 5.5 mm, për të cilën nuk kishte leje.

Me udhëzim të Prokurorit të Shtetit, armët janë sekuestruar, i dyshuari është shoqëruar për intervistim në Stacionin Policor në Klinë, e më pas është liruar, ndërsa rasti do të procedohet më tutje në procedurë të rregullt për përdorim të armës dhe armëmbajtje pa leje.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.