Blog

Letra e plotë:

Letër publike drejtuar Kryeministrit të Kosovës nga Troja Muja, nga një nxënëse që e la çdo gjë pas për ëndrrën që sot po i shuhet padrejtësisht

I nderuar Kryeministër, Albin Kurti

Po ju drejtohem me këtë letër jo si politikane, as si dikush që kërkon favore por si një vajzë që 12 vite i ka jetuar me përkushtim, sakrificë dhe dashuri për dijen. Jam Troja, nxënëse e shkëlqyer e Gjimnazit, me të gjitha notat 5, pa mungesa, pa përsëritje, pa asnjë lëshim. Asnjëherë nuk kam kërkuar rrugë të shkurtër. Kam zgjedhur të jem e ndershme edhe kur ishte më e vështira.

Kam shkuar në shkollë edhe kur kam qenë e sëmurë, vetëm që të mos ngec pas, që të mos më mungojë asnjë kapitull. Kam lënë anash çdo gjë që shumica e bashkëmoshatarëve e kishin përditshmëri: daljet, argëtimet, qetësinë. E gjithë përpjekja ime kishte një qëllim: të pranohem në Fakultetin e Mjekësisë.

Por sot, Kryeministër, unë nuk jam aty. Jam jashtë. Jo sepse nuk kam ditur, por sepse një sistem i padrejtë më la jashtë.

Në testin e arritshmërisë mora 64 pikë, ndërsa të tjerë, që për 12 vite nuk kanë ditur as të marrin notë kaluese pa ndihmë, dolën me 92 pikë. Pse? Sepse aty nuk fitoi dija por mundësia për të kopjuar lirshëm, pa kontroll, pa drejtësi. Ndërsa mua dhe të tjerëve si unë, na është bërë presion, na ka qëndruar komisioni mbi kokë, kemi qenë nën stres e ankth, nuk na është dhënë as hapësira e as frymëmarrja për të treguar veten.

Në testin e Fakultetit të Mjekësisë, unë kam plotësuar 75% të pyetjeve me dije, me punë, me sakrificë.

A nuk është kjo e mjaftueshme për të kuptuar se sistemi po i ndëshkon më të ndershmit?

Sot, shumë prej nesh po dorëzohemi, jo nga paaftësia, por nga zhgënjimi. Ëndrrat tona po shuhen para syve të prindërve tanë që kanë dhënë gjithçka për ne. Ju lutem, mos heshtni para kësaj padrejtësie.

Po ju drejtohem si Kryeministër por mbi të gjitha si prind. A do të heshtnit nëse vajza juaj do të sakrifikonte gjithçka, dhe në fund një sistem i padrejtë do ta linte jashtë?

Ju kërkoj drejtësi. Jo për mua si individ por për të gjithë ne që besuam se suksesi vjen nga përpjekja e ndershme.

Me respekt,
Troja Muja

Nxënëse e dalluar,
Aspirante për Mjekësi e padrejtësisht e përjashtuar nga e drejta për të ndjekur ëndrrën.