Një ngjarje e rëndë ka ndodhur në mbrëmjen e 26 korrikut në qytetin e Vlorës, ku një kamerier 18-vjeçar është dhunuar fizikisht gjatë orarit të punës nga një efektiv policie jashtë shërbimit dhe një person tjetër. Incidenti ka ndodhur në sy të klientëve të pranishëm, mes tyre edhe turistë të huaj.

Sipas pamjeve të siguruara nga Report TV, dy shtetasit Ardian Isufi ish-drejtor i qarkullimit rrugor në Vlorë dhe aktualisht pjesëtar i Policisë së Dibrës dhe Leart Bimo, një emër i njohur për forcat e rendit në Vlorë, kanë dhunuar kamerierin Ron Balaj për një shishe uji që pretendojnë se ishte më shumë nga çfarë kishin porositur.

Në video, shihet qartë momenti kur Isufi afrohet pranë banakut ku ndodhet Balaj, i flet dhe e qëllon me shuplakë në fytyrë.

Pas tij, ndërhyn edhe Bimo, i cili i afrohet kamerierit dhe e godet disa herë radhazi.

Kamerieri ka bërë kallëzim pranë policisë, dhe është marrë në pyetje së bashku me dëshmitarët dhe stafin tjetër të hotelit.

Deri më tani, Policia e Vlorës nuk ka dhënë asnjë reagim zyrtar për incidentin, ndërkohë që i riu ka treguar versionin e tij për atë që ndodhi, duke përshkruar momentet e tensionit dhe dhunës që pasuan pretendimin për një shishe uji më tepër.

Më poshtë pamjet: