“S’e japim Serbinë”, “Lufto kundër bllokadave të Kurtit”, “E dua kthimin e Serbisë sime” janë vetëm disa nga shkrimet që janë vendosur në disa komuna me shumice serbe në Kosovës.

Parulla me thirrje nacionaliste dhe kundër institucioneve të Kosovës janë vendosur këtë të diel edhe në komunën e Graqanicës, komunë e cila është e banuar me serbë.

Posterët në gjuhën serbe janë vendosur edhe në fshatin Koretishtë të Novëberdës e në Mitrovicë të Veriut.

Nga policia e Kosovës, nuk kanë kthyer përgjigje gjatë ditës, nëse janë duke hetuar apo kanë identifikuar ndonjë person për këtë.

Shkrimet e tilla janë të nxitura nga Beogradi dhe nuk janë shqetësuese, vlerësojnë njohësit e sigurisë.

“Kjo tregon se Serbia e ka humbur fuqinë e vet brenda territorit të Kosovës, pra vetë pushteti i Vuçiqit sepse në të kaluarën nuk ka pasur nevojë që të shkruhen parulla sepse i kanë pas prezent forcat e sigurisë së tyre nga policia, xhandarmëria e BIA, e tash i ka mbetur vetëm parulla dhe përpjekja e tyre për ta destabilizuar situatën në Kosovë, në përgjithësi e në katër komunat veriore, unë nuk shoh asnjë shqetësim..”, ka deklaruar Avni Islami – njohës i sigurisë.

Në anën tjetër Arben Dashevci thotë se institucionet e sigurisë do duhej të gjejnë autorët e këtyre shkrimeve dhe se veprimet e tilla vijnë edhe para zgjedhjeve lokale.

“Nëse e shikojmë atë aspektin e sigurisë brenda Kosovës si në katër komunat matanë lumit Iber, nuk mund të cenohet siguria e brendshme për shumë e shumë arsye sepse ata që e kanë cenuar atë sigurinë e brendshme ose që e kanë bërë direkt në Kosovë nuk gjenden më dhe tash para zgjedhjeve kjo është forma e mënyrës së veprimit të tyre por nuk shoh cenim të sigurisë së brendshme të Republikës së Kosovës”, ka deklaruar ai.

Shkrimet e tilla vendosen, një ditë pasi në Kuvendin e Kosovës, deputetët e Listës serbe nuk morën votat e mjaftueshme për nënkryetar të Kuvendit.

Të njëjtit çështjen e kanë dërguar në Gjykatën Kushtetuese të Kosovës./Tv Dukagjini/