Gazetari Vehbi Kajtazi ka thënë se kryeministri Albin Kurti i ka ditët e numëruara para se i njëjti të përfundojë në burg. Sipas Kajtazit, Kurti do të përfundojë si i akuzuar në skandalin me rezervat shtetërore.

I ftuar në Rubikon të Klan Kosovës, Kajtazi ka thënë se veprimet e Kurtit përbëjnë cenim të rendit juridik në Kosovë.

Sipas tij përpara ligjit janë të gjithë të barabartë, përndryshe “do të shndërroheshim në diktaturë”.

“Në momentin që ka një diskutim të tillë në momentin që dikush i jep të drejt Kurtit ne jemi tu rrëshqit në anarki. Ky është cenim i rendit juridik dhe mendoj se ka edhe thirrje për rezistencë. Shteti ka rregulla e mbi këto është kushtetuta ku të gjithë jemi të barabartë. Nuk ka dikush më të barabartë”, ka thënë fillimisht Kajtazi.

“Këto janë pallavra sepse Kurti e di se do të përfundojë i akuzuar sepse ka shkelur tri ligje e një rregullore. Ligjin për rezerva shtetërore kur është klasifikuar si sekret shtetëror blerja e rezervave. Ligjin për prokurim publik pasi që ky ligj nuk lejon që rezervat shtetërorë të blihen me procedurë të mbyllur. E ka shkelur rregulloren 2019/4 që ka të bëjë për blerje të armatimit e këta e kanë paraqitur kinse për sekrete shtetërore. Dhe e ka shkelur vendimin për klasifikim pasi që i kanë dhënë qasje personave të pa verifikuar në këtë procedurë”, deklaroi ai.

Sipas Kajtazit, Kurti i ka ditët e numëruara përpara se të përfundojë në burg.

“Kurti i ka ditët e numëruara kur do të shkojë në burg, kjo është procedurë. Do të shqiptohet një gjobë, e më pas edhe një gjobë por mbase edhe tri gjoba por në fund do të detyrohet që të shkoj në paraburgim”, ka thënë Kajtazi.