Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve mes të rinjve në vendin tonë. Për pasojë, konfliktet jo rrallëherë eskalojnë edhe në rrahje brutale, për çka nevojitet ndërhyrja e Policisë, raporton Gazeta Sinjali.

Një rast i tillë ka ndodhur mbrëmjen e 25 korrikut në qendër të Ferizajt. Burimet e Sinjalit brenda hetuesisë bëjnë me dije se rreth orës 20:55, në lokalin “Cherry Lounge Bar” që ndodhet në sheshin “Dëshmorët e Kombit”, ka ndodhur një sulm fizik i dhunshëm ndaj një punonjësi të sigurimit.

Viktima është identifikuar si A.M., rreth 41-vjeçar, i cili ishte duke kryer detyrën e tij si sigurim fizik kur u sulmua brutalisht nga katër persona: A.I., rreth 28-vjeçar, K.M., rreth 33-vjeçar, E.K., rreth 26-vjeçar dhe I.M,, rreth 29-vjeçar. Të dyshuarit, sipas Policisë, kanë përdorur mjete të forta dhe një mjet të mprehtë – thikë – për ta goditur viktimën, duke i shkaktuar lëndime të rënda trupore.

Viktima fillimisht është trajtuar në emergjencën e Ferizajt, ndërsa më pas është dërguar në QKUK në Prishtinë për trajtim të specializuar.

Hetuesit kanë dalë në vendin e ngjarjes dhe kanë siguruar pamjet e kamerave të sigurisë, përmes të cilave janë identifikuar katër autorët e dyshuar. Dy prej tyre, Kemajl Muslija dhe Eduard Kadriu, janë arrestuar, janë intervistuar në prezencë të avokatëve dhe me urdhër të Prokurores kujdestare, janë dërguar në mbajtje për 48 orë.

Dy të dyshuarit e tjerë, A.I., dhe I.M., janë ende në arrati dhe janë shpallur në kërkim nga Policia. Hetuesit janë në terren për t’i lokalizuar dhe arrestuar sa më shpejt.

Rasti është cilësuar si “Lëndim i rëndë trupor” dhe “Sulm”, ndërsa hetimet po vazhdojnë me intensitet të shtuar nën mbikëqyrjen e Prokurorisë Themelore të Ferizajt.

Sinjali do t’ju mbajë të informuar për çdo zhvillim të ri lidhur me këtë ngjarje.