Gazeta Sinjali ka siguruar detaje ekskluzive lidhur me një rast të rëndë që kishte ndodhur më 11 prill 2025 në rrugën “Bardhyl Qaushi” në Gjakovë, ku një përplasje mes dy personave përfundoi me përdorim të armës së zjarrit dhe plagosje të rëndë trupore.

Sipas informacioneve, konflikti mes Pjetër Nushit rreth 32-vjeçar dhe Sokol Pnishit rreth 35-vjeçar përshkallëzoi në dhunë të armatosur, ku ky i fundit dyshohet se ka shtënë tri herë në drejtim të viktimës, duke e plagosur atë me tre plumba në këmbën e djathtë.

Përkundër tentativës për vrasje, viktima është jashtë rrezikut për jetë dhe po trajtohet në Spitalin Rajonal “Isa Grezda” në Gjakovë.

I dyshuari ishte larguar menjëherë nga vendi i ngjarjes bashkë me armën, duke u shpallur në kërkim policor. Në vendin e ngjarjes janë gjetur dy gëzhoja të zbrazëta dhe një fishek i kalibrit 9×19 mm. Policia, përmes njësive relevante dhe me mbështetjen e Prokurorit të Shtetit, kishte nisur një hetim intensiv.

Pas një pune të vazhdueshme nga Sektori Rajonal për Hetime në Gjakovë, më 29 prill 2025, i dyshuari Sokol Pnishi ishte paraqitur vetë në Polici së bashku me avokatin e tij, ku është intervistuar dhe me vendim të Prokurorit të çështjes, ishte ndaluar për 48 orë.

Ndërkohë, më 17 korrik 2025, hetuesit kanë pranuar informatë shtesë lidhur me lokacionin ku ishte fshehur arma e përdorur në rast. Informacioni, që sipas dëshmitarit ishte marrë nga djali i tij, ka çuar hetuesit dhe teknikët kriminalistikë në dalje të fshatit Skivjan, drejt hyrjes së fshatit Planqor, ku në shkurre anash rrugës është gjetur një pistoletë e llojit 9mm dhe një karikator pa fishekë.

Arma është sekuestruar si provë materiale, ndërsa rasti është ende nën hetim nga Sektori Rajonal për Hetime në DRP Gjakovë, me cilësimin “Vrasje e rëndë në tentativë”.

Gazeta Sinjali do të vazhdojë ta ndjekë këtë rast.