FSHF: Kënga ‘Mora fjalë’ u zëvendësua me ‘Albania’ të Capital T
Federata Shqiptare e Futbollit (FSHF) ka reaguar zyrtarisht ndaj polemikave të krijuara së fundmi rreth mungesës së këngës “Mora fjalë” të Shkurte Fejzës në ndeshjet e Kombëtares Shqiptare. Përmes një editoriali nga Drejtori i Komunikimit, Fatjon Kodra, FSHF ka sqaruar se këngët e zgjedhura për kolonën muzikore të Europianit 2024 janë “Rrjedh në këngë e ligjërime” e Vaçe Zelës dhe “Albania” e Capital T.
Në deklaratë thuhet se këto zgjedhje u bënë muaj më parë, në mënyrë transparente dhe me konsultime publike, duke theksuar se nuk ka asnjë qëllim për të censuruar këngë të tjera, përfshirë edhe “Mora fjalë”.
Njoftimi i plotë i FSHF:
“Ndodh shpesh që rreth lojës tonë të bukur të shpiken çështje, edhe kur nuk ka. Në këtë rast, mungesa e një kënge është alibia e radhës për të prodhuar debat. Për të qenë të qartë: FSHF ka zgjedhur si kolonë muzikore për Europianin këngët ‘Rrjedh në këngë e ligjërime’ dhe ‘Albania’. Këto ishin zgjedhje institucionale dhe nuk kanë asnjë lidhje me censurimin e këngës ‘Mora fjalë’, e cila mbetet një nga këngët e dashura të tifozëve tanë.”
FSHF gjithashtu shtoi se kënga “Po ku ka si ti o Shqipëria ime!” është shndërruar në një brand që e shoqëron Kombëtaren në çdo ndeshje, duke përfaqësuar pasionin e gjithë shqiptarëve.
Deklarata përfundon me theksimin se polemikat janë të shpikura dhe të pajustifikuara, duke bërë thirrje që vëmendja të fokusohet te mbështetja për Kombëtaren.
