KQZ-ja del me njoftim të ri, në këto 9 komuna ka përfunduar numërimi i votave
Komisioni Qendror i Zgjedhjeve ka njoftuar se në nëntë komuna ka përfunduar numërimi i votave të zgjedhjeve të 9 shkurtit.
KQZ-ja ka deklaruar se deri më tani janë numëruar 46.19 për qind e vendvotimeve.
“Sipas të dhënave të pranuara nga Qendrat Komunale të Numërimit, në të cilat është duke vazhduar apo ka përfunduar procesi i numërimit të votave të kandidatëve për deputetë nga Zgjedhjet për Kuvendin e Kosovës, deri më 15 shkurt 2025, ora 16:00, janë numëruar 46.19% e vendvotimeve apo 1,170 nga 2,533”, thuhej në njoftim.
“Procesi i numërimit të votave ka përfunduar në 9 Qendrat Komunale të Numërimit (QKN) në komunat: Novobërdë, Obiliq, Shtërpcë, Junik, Hani i Elezit, Ranillug, Partesh, Kllokot dhe Mitrovicë e Veriut”, thuhej më tej.
Më 15 shkurt, në orë 16:00, ka filluar procesi i numërimit edhe në QKN-në e komunës së Mamushës.
Në përgjithësi, procesi i numërimit është duke vazhduar në 26 Qendra Komunale të Numërimit.
