I dehur e kërcënoi menaxherin e pompës së derivateve, dërgohet në mbajtje

Një rast kanosjeje serioze është raportuar mbrëmë në fshatin Gazivodë të Zubin Potokut, ku një person i dehur dyshohet se ka kërcënuar menaxherin e një pompe derivatesh, raporton Gazeta Sinjali.

Burimet e Gazetës Sinjali brenda Policisë bëjnë me dije se më 12 korrik 2025, rreth orës 18:15, nga pompa e derivateve “Lab-Oil” është raportuar një incident, ku S.H, rreth 25 vjeçar – menaxher i pikës – ishte kanosur nga një klient, i identifikuar si Zlatko Vlasković, rreth 48-vjeçar.

Sipas burimeve, njësia policore ka reaguar menjëherë dhe ka ndaluar të dyshuarin, i cili është dërguar në Stacionin Policor të Zubin Potokut. I dyshuari ka kundërmuar erë të fortë alkooli, por ka refuzuar t’i nënshtrohet alkool-testit.

Gjatë intervistimit, viktima dhe dëshmitari – D.R. (2002) – kanë deklaruar se janë kanosur drejtpërdrejt nga i dyshuari. Pasi ishte larguar fillimisht nga vendi i ngjarjes, Vlasković ishte rikthyer pas 10 minutash, dhe nga automjeti i tij ka përsëritur kanosjet ndaj të dëmtuarit, duke thelluar seriozitetin e rastit.

Lidhur me ngjarjen është njoftuar Prokurori i Shtetit, i cili ka urdhëruar që ndaj të dyshuarit të caktohet masa e ndalimit prej 48 orësh, ndërsa rasti është iniciuar për veprën penale “Kanosje”.