Rreth orës 13:35, Policia e Kosovës ka pranuar një informacion për një rast të dyshuar në hapësirat e “Parkut Inovativ”, që gjendet në ish-kazermën ushtarake në Prizren.

Sipas njoftimit, një person i gjinisë mashkullore, rreth 55 vjeç, është gjetur pa shenja jete.

Sipas Policisë, të dhënat fillestare tregojnë se i ndjeri ka qenë punëtor në atë park.

“Njësitet relevante policore kanë reaguar menjëherë duke dalë në vendin e ngjarjes, ku kanë kryer të gjitha procedurat hetimore, përfshirë ekzaminimin e vendit, mbledhjen e provave materiale dhe marrjen e deklaratave nga dëshmitarët”, thuhet në njoftim.

Me urdhër të prokurorit të shtetit, trupi i pajetë është dërguar në Institutin e Mjekësisë Ligjore në Prishtinë për obduksion, me qëllim të përcaktimit të shkaktarit të saktë të vdekjes.

Policia e Kosovës ka iniciuar rastin si “Hetim i vdekjes” dhe është duke ndërmarrë të gjitha veprimet hetimore për zbardhjen e plotë të rrethanave të ngjarjes./rtk