Para të falsifikuara deponohen në TEB Bankë

Trendi i parave të falsifikuara ka ‘lulëzuar’ në Kosovë për një kohë të gjatë, ku qindra e mijëra euro false janë vënë përditë në qarkullim. Rastet e tilla raportohen kryesisht nga zyrtarët e bankave në vend, teksa monedhat metalike që më së shumti dalin false janë 1 dhe 2 euro, si dhe kartëmonedhat 50 e 100 euro, raporton Gazeta Sinjali.

Një rast i tillë ka alarmuar autoritetet në Prishtinë, pasi në një degë të bankës TEB janë zbuluar shuma të konsiderueshme parash të falsifikuara.

Burimet e Gazetës Sinjali bëjnë të ditur se sot, më 25 gusht 2025, ankuesja A.M., rreth 27-vjeçare, arkëtare në degën e Bregut të Diellit, ka raportuar se gjatë deponimeve të klientëve janë konstatuar kartëmonedha dhe monedha të falsifikuara.

Në total, janë evidentuar 960 euro të falsifikuara: 780 euro në kartëmonedha, 180 euro në monedha metalike, të cilat janë deponuar nga 21 klientë të ndryshëm, në periudhën 29 korrik 2024 – 18 gusht 2025.

Paratë janë sekuestruar dhe me urdhër të Prokurores së Krimeve të Rënda, Fitore Sadikaj, do të dërgohen për ekzaminim.

Rasti është cilësuar si “Falsifikim i parasë” dhe ka nisur hetimet për identifikimin e burimit të tyre.