Dy persona janë arrestuar nga autoritetet britanike për zjarrvënie në një restorant në Ilford.

Zjarri shpërtheu në restorantin “Indian Aroma” në zonën Ilford, duke shkaktuar dëme të mëdha materiale dhe plagosjen e disa personave. Tre persona u dërguan me urgjencë në spital në gjendje kërcënuese për jetën, ndërsa dy prej tyre mbeten në gjendje kritike edhe këtë të diel.

Sipas Policisë Metropolitane, dy persona të tjerë dyshohet se janë larguar nga vendngjarja përpara mbërritjes së forcave të rendit. Hetimet janë ende në zhvillim për të identifikuar këta individë.

Pamjet e kamerave të sigurisë, të siguruara nga agjencia britanike PA, tregojnë një grup personash me fytyra të mbuluara duke hyrë në restorant dhe duke derdhur një lëng të panjohur në dysheme. Vetëm pak sekonda më pas, brendësia e restorantit përfshihet nga flakët.

“Ndërsa kemi arrestuar dy persona, hetimi ynë vazhdon me ritëm të shpejtë në mënyrë që të kuptojmë plotësisht çfarë ndodhi të premten në mbrëmje”, u shpreh DCI Mark Rogers nga Policia Metropolitane.

Autoritetet u kanë bërë thirrje qytetarëve që mund të kenë informacion për ngjarjen të kontaktojnë menjëherë policinë.