Dinamo Tirana ka bërë një paraqitje historike duke mposhtur 3-1 Hajduk Split dhe duke siguruar kalimin në fazën tjetër të UEFA Conference League me rezultat të përgjithshëm 4-3.

Pas humbjes 2-1 në ndeshjen e parë në Kroaci, skuadra shqiptare e nisi fuqishëm mbrëmjen, duke kaluar në avantazh në minutën e 14-të me golin e Zabergjës, asistuar nga Bregu. Miqtë barazuan në minutën e 99-të me Karacic, por Dinamo nuk u dorëzua dhe shënoi dy herë në pjesën e dytë të kohës shtesë, me Qardakun (109’) dhe Berishën (111’), duke vulosur një mbrëmje për t’u mbajtur mend.

Ndeshja mori një kthesë të rëndësishme në minutën e 78-të, kur Hajduk mbeti me 10 lojtarë pas përjashtimit të Sanyang me dy kartona të verdhë.

Përballë mbështetjes së zjarrtë të tifozëve, Dinamo shfrytëzoi epërsinë numerike dhe e mbylli takimin me një fitore të madhe.

Me këtë sukses, Dinamo Tirana jo vetëm që eliminon një nga skuadrat më të njohura të Kroacisë, por gjithashtu shkruan një faqe të artë në historinë e saj europiane.

Stadiumi shpërtheu në festë në fund të ndeshjes, ndërsa lojtarët dhe stafi teknik përqafuan kualifikimin e merituar.