Koalicioni qeverisës në Gjermani ka vendosur të përgjysmojë numrin e punëtorëve të lejuar të hyjnë në vend përmes programit të Ballkanit Perëndimor, duke e reduktuar atë nga 50,000 në 25,000 në vit.

Ky vendim vjen si rezultat i negociatave mes partive kryesore politike, CDU/CSU dhe SPD, të cilat po punojnë për të arritur një marrëveshje të re për politikat e migracionit dhe punësimit.

Vendimi pritet të ndikojë drejtpërdrejt në mijëra punëtorë nga vendet e Ballkanit Perëndimor, të cilët kanë shfrytëzuar këtë skemë për të gjetur punë në Gjermani.

Megjithatë, autoritetet gjermane theksojnë se masa është pjesë e një qasjeje më të gjerë për rregullimin e tregut të punës dhe balancimin e nevojave ekonomike të vendit.

Ende nuk ka një reagim zyrtar nga qeveritë e vendeve të prekura nga ky vendim, por pritet që kjo çështje të shkaktojë debat në rajon dhe në qarqet ekonomike në Gjermani.