Vajza 15-vjeçare e denoncon babanë për dhunë – më rrahu me gyp uji dhe rrip pantallonash

Gazeta Sinjali sjell një rast të rëndë të dhunës në familje që ka ndodhur në fshatin Llukavc i Begut të komunës së Istogut, ku një vajzë e mitur ka raportuar se është rrahur në mënyrë sistematike nga babai i saj.

Burime të sigurta të Sinjalit brenda Policisë bëjnë me dije se më 25 maj 2025, rreth orës 21:20, është raportuar rasti në Stacionin Policor në Istog, ku patrulla policore ka ndërhyrë menjëherë dhe ka kontaktuar me viktimën dhe të dyshuarin – babë e bijë.

Viktima, B.G., e lindur më 2009, ka deklaruar para autoriteteve se para dy-tre ditësh ishte rrahur me gyp të ujitjes, ndërsa dy apo tre muaj më parë kishte përjetuar dhunë me rrip të pantallonave. Ajo është intervistuar në prani të zyrtares së Qendrës për Punë Sociale, ku ka dhënë një dëshmi të detajuar.

I dyshuari, Rrahman Gërguri, 49-vjeçar, është shoqëruar gjithashtu në Stacionin Policor dhe ka mohuar çdo dhunë fizike apo psikike ndaj vajzës së tij. Ai ka pohuar vetëm se i kishte bërtitur lidhur me mësimet dhe ndihmën në punët e shtëpisë.

Viktima është dërguar në QKMF në Istog, ku sipas raportit të mjekut nuk janë evidentuar lëndime të dukshme trupore, por hetimet kanë vazhduar me marrjen në pyetje të motrës së saj, e cila në cilësinë e dëshmitares ka konfirmuar se kishte marrë njoftimin për dhunën përmes një bisede telefonike me motrën më të vogël.

Në lidhje me rastin është kontaktuar Prokurori kujdestar, i cili ka urdhëruar që të iniciohet rasti penal për “Dhunë në familje”, ndërsa i dyshuari është liruar në procedurë të rregullt.